كلمات واخرى ذكريات رسائل وعبارات لأغلى بشر كانوـآ هنـآ ورحلو الأن .!

دائما يكون حديثي عن والدي الذي انجبني

ولكن حديثي اليوم وذكرياتي عن اب لم احمل اسمه ولم انسب اليه ولكنه كان والدي

وان صح التعبير ـ((أبويا ))



معلومات عنه :

ابويا عيسى من مواليد مكه المكرمه صلة القرابه في الأوراق خال جدتي

وفي الحقيقه هوا والدي وجدي وجميع الناسس

واكثر ما اتذكره عندما ابحر في ذكرياتي معه انني كنت طفلته المدللة

وانه كان ابي واكثر شي احببته في حياتي هوا وجوده

وانه كان درع لحمايتي حتى من والداي !!

كان يهتم بي اكثر من اي شي اخر افتقد تدليله لي افتقد كلماته ونصحه ليه

افتتتتتقد وجوده وذالك الجمال الذي كان يكسو المنزل بوجوده



معلومة : كانت لدي الكثير من الكلمات المكاويه في لهجتي العاميه المأخوده منه

وليست اي كلمات وانما كلمات اهالي مكه القداما والأصلين

كانت مضضضحكه للجميع خصوصا انني كنت طفله حينها



ذات يوم كنت استمعه وهوا يتحدث عن الأموات والقبور والعضه والعبره

وببرائه وجهت له سؤال كان كتالي



ابووويا دحينا لما نموت ناخد عازاتنا معانا >

عازاتنا = اغراضنا = اشيائنا خخ

المهم انو سرت مسخرتهم لين دحين ولما يتريقو عليا يذكروني ب هالجمله خخ

بالمناسبه تعبت وانا اتكلم ب الغه العربيه هع



ابويا عمري ما كتبت لك شي قبل اليوم

يمكن لأنو ما قدرت اختصرك في حروف او خفت ما اوصفك مثل ما انت

بس انكسرت العقده ومن دحين لين اخر يوم ليا راح اكتب عنك وعنهم

انتو رحتو بس وجودكم حييي داخلي



ابويا ما كان يحبني البس قصير ابد انا بالذات من بين كل اخواتي مع انو كنت صغيره

وكل ما يشوفني البس يخاصمني واروح اغيرو عشان ما يزعل

بس بعد ما اتوفى سرت البسسس والبس والببسسسس

مدري عاد كنت اعااند مين بس يمكن لأنو ابي يرجع ويخاصمنننني !!

كان يهتمممم بكللل ششي يخصصننني حتى طريقة كلامي

كان مررره يهتم بشعراتي كانو مره طوال وكل الناس كانت عينهم منو

انو مشاء الله كان طوووووويل وكثير

كان يشتريلي كريمات وزيوت ويحكي لسستي انو حطيلها وهكا

ما كان يرضى حتى ينقص طرف منو

وانا مستحيل افكر مجرد تفكير انو اقصصصو

ما كنت احب ازعلو ابببببببببد

واول مره قصيتو بعد ما كان مره طويل بعد ما اتوفى بابا

ولما كلهم اقنعوه انو منشآن يفرحوني لأنو نفسيتي تعبانه 

و عشانو طويل مافيني اتحكم فيه ولا اعرف امشطو وهكا

وانو لسى صغنونه و و و و .... الخ

بالمناسبه عمري ما سرحت شعراتي ومشطتهم

من قبل ما اقص شعري اصلا ما كنت اعرف امشطهم خخ

المهم انو

ستي كلمتو وماما كلمتو لين ما وافق

وجو قالولي وانا قلت مابببي

ابويا مو راااضي... ونزلوني عندو وحكالي انو موافق ويومها قصيتو
بعد معاناه وهما يقنعوني

وبعد ما اتوفى سرت كل ما تعبت نفسيتي اقصصص شعري

اذا مو كل شعري اقص غرتي او اي جزء من شعري

 يمكن سارت عاده عندي لأنو هوا سمح فيها قبل لما كنت متضايقه !
وسرت امشي عليها بدون ما الااحظ

وبالمنااسبه ما سار يهمني شعري قصر طول كثير او سار خفيف

 لأنو اللي كان يهمو ماتتت



كان هوا اللي يعملي السريلاك ويأكلني

وكنت انام جنبو وانا صغنونه
وكنت من الصباح انزل عندو وهوا نايم ادخل غرفتو واشغل اسبيستون
كانت توها طالعه داك الوقت بالمناسبه كنت مره احححبها خخ
هوا اللي علمني كيف اتوضى وكيف اصلي دايم كنت اراقبو وهوا يتووووضى
داييم كنت معاااااه



هوا اللي يشتريلي ويشتري لكل اخواتي

الشنط والجزم تبع المدرسه وهوا اللي يفصلنا المرايل على حسابو
كنا قبل المدرسه ب اسبوعين تقريبا ياخدنا كلنا في البااص تبعو ومع السواق

ونروح نششتري

وهوا يشتريلنا الأقلام والدفاتر وكل اغراض المدرسه
بابتي ما كان يشتريلنا اي شي للمدرسه

او  ابويا ما كان يخليه ابد 

 كل شي يخص المدرسه كان هوا يجبلنا ياه
حتى معجون الأسنان والفرش حتى الشراريب كل شي كل شييي

تخيلو كان عندو زي الدولاب خشبي  حاطو في غرفتو وا مفصلو

وقبل الدراسه بكم اسبوع يروح يشتري درازن دفاتر ابو ستين وابو ميتين وابو 100
 و و و ...الخ
وبرايات وكراريس والوانكل اشكالها شمعيه مائيه خشبيه كل شي 

 ومساطر واقلام وكل شي يخطر ببالكم

وحتى الشرايط اللي تنحط في الشعر برضو هوا كان يجيبها من ضمن الأغراض
وحتى تجليد الكتب والغرا والمقصات ب اختصار مكتبه مصغره في بيتنا



كنا نحسس بطعمم الدرااااسه ونتحمسلهاا ونحنا نرتب هالأغراض في الدولاب

ولا بعد كل ما يطلع شي جديد في الدفاتر وكيدا كنا نروح نقلو منشآن يجبلنا هوا
تخيلو كلنا بعد اول يوم دراسه او تاني يوم دراسه
 ننزل عندو وبيدنا اوراق الطلبات تبع المدرسه
ونوقف بالدور وهوا ياخد الورقه
ويخلي خيتو الكبيره تقرألو شو هيا وخيتو التانيه تطلعها من الدولاب
وكل ماحدا ياخد اغراضو يطلعو برا الغرفه وهكا لين ما الكل ياخد اغراضو
كانت ايامممم تجننن




اااااه بس

كل شي سار ماله طعععم بعدد ماراح

تعرفو المثل اللي ينقال ضربتين في الراس توجع ؟؟

هذي اللي انقال بعد ما اتوفى بس في الحقيقه هي ما توجع وبس هي تقتل بس ببطئ !

بابتي اتوفى لما كنت اولى متوووسط كانت صدممممممممه كانت فااااااااااااااااااجعهههه

بس هانت لأنو كان فيه اللي يعوضنا كان موجود ابووويا

بس السنه اللي بعدها على طول وانا تاننننيه متوووووسط هوا راح كمانننن ..!!

الحممممدد الله على كل شي

راحو بركة البيت راحو السند راحو اللي كنت افتخر بوجودهم

 راحو اللي كنت اقول للكل اني محظوووظه فيهم



كان دايمم يحكيلي شاطره وانو راح تطلعي دكتوره

لأنو كنت ذكيه وفصيحه

خيبتلو املو ....لأنو قلبي بعد ما راحو ما يتحمل اي منظر بشعع

وحتى الدراسه ما كنت ماخدتها بجديه

واصلا ماحدا كان مهتم بهالموضوع

لأنو في نظرهم انا البنت اللي ما ينخاف عليها ونجاحها مفروغ منو

ما سرت دكتوره في الواقع بس عالجت ناس كثير او حاولت اعالجهم نفسيا
ما سرت ذكتوره بس اوعدك انو ارفع اسمك في شي تفتخر فيه اذا ربي اعاطاني العمر
وعسى ربي يقويني عليه



ابويا كان المسؤل الأول عن المسجد تبع حارتنا ..

في رمضان السفر والمووويه والعصيرات والمناديل كان هوا يجيبها

غير اللي يشتريها منشآن نوديها مع الفطور كل يوم في رمضاان

كان المسجد في محل اهتمامه في رمضان او غيرو
وكان يجمع القرأن والكتب ويوديها للممسجد



كنت في الأجازه الكبيره انزل عندو واذا لسى ماحدا صحي انا اسويلو الفطور

كنت احطلو انواع الأجبان وافتح تونه واعمل بيض على الزيت

واحطلو مقدوس اللي هوا البادنجان اللي جواتو مابعرف شو

وكل شي وحتى الشاي انا كنت اعملو لأنو هوا معلمني ياااه

كنت مرات ازبط البيض ومرات يكون مافيه ملح ومرات يكون كل الملح فيه هههه

وعمرو ما اتريق على طبخخخي بالعععككس كان ياكلو كلو عشان يحمسني
حتى لو ماكان لزيز
الله يييرحممموو

تعرفو هوا اول رجال في حياتي كنت اشوفو يغسل ملابسو بنفسو
مع انو في شغاله وستو مهتمه فيه وفي كل شي خصو
بس هوا مرات كان يغسلها بنفسو وكان يعلمني
ومرات هوا يغسلها ويحكيلي اروح انشرها في الحوووش
حتى الشغل كنت احبو وما كنت اتأفف منو كنت اسوويه والضحكه شاقه فيسي

اتمنى ترجع ديك الأيااامم

في حياتي كلها محد اهتم فيا مثل ابويا ولا احد دللني مثلوو
ما كان يرضى فيا لااببببد
وكل حاججهه يبيها ليا

بالمناااسبه هوا اللي مسميني ب اسسسمي الحين

وهوا الوحيد اللي كان ينطقو صصصح في عيلتنا

ما انسسااه طول عمري ولا انسسى فضله عليا لين ما اموت
وماراح انسى انه اكثر انساانن اسعدني في هالحياة
ربي اجمعني فيه وب احبتي في جنات النعيييم
الله يرحمك يا اغلى واغلى واغلى كل شي في حياتي وراح الحين
الله يرحممككك ابويا ..||!